కొంతకాలం తర్వాత ఎల్లప్పుడు శివ ధ్యాన నిష్టాగరిష్టుడు, సకల శాస్త్ర ప్రవీణుడు, సకల సంపదలతో తులతూగుతూ, ప్రజల కష్టకాలంలో ఆపద్బాంధవుడిగా పేరొందిన వారి యొక్క పెద్ద కుమారుడు శ్రీ కొండా వెంకటాద్రి గారు కాశీ యాత్రకు వెళ్ళడం జరిగింది. కాశీలో విశ్వేశ్వరుణ్ణి దర్శించి, సేవించి కొద్ధికాలం అక్కడనే ఉండి ప్రముఖ ఈశ్వర దేవాలయాలను సందర్శించి అనేక అభిషేక కార్యక్రమములను నిర్వహించాడు. జట్కా బండిలో తిరుగుప్రయాణం సాగించుచుండగా కొంత దూరం ప్రయాణించిన తరవాత జట్కా బండి గుర్రములు ఎంత ప్రయత్నించినా ముందుకు కదలకుండా నిలబడి ఉండెను.

అక్కడ దగ్గరలో ఒక ముని ఆశ్రమము కనిపించెను. అక్కడికి వెళ్లగా ఆశ్రమం వద్ద ఉన్న ఒక వట వృక్షం క్రింద ఒక ముని తపస్సులో లీనమై ఉన్నాడు.

ఆ మునీశ్వరుడు దివ్య దృష్టితో చూసి నీవు ధన్యుడవు, నీకు ఈశ్వర అనుగ్రహం కల్గింధని చెప్పి ఆశ్రమంలోకి వెళ్లి ఒక శివలింగాన్ని మరియు నంది విగ్రహాన్ని తెచ్చి ఇచ్చెను.

ఈ లింగమును మీ గ్రామములోని శ్రీ ఆంజనేయ స్వామి దేవాలయము లోనే ప్రతిష్టించి, నిత్యం పూజించమని తెలియజేసినారు. అందువలన మీకు మీ వంశానికి, సమస్త గ్రామ ప్రజలకు సుఖసంతోషాలు, ఆయురారోగ్యములు, అష్ట ఐశ్వర్యాలు కలుగుతాయని ఆశీర్వదించి పంపినాడు. అది ఈశ్వర అనుగ్రహంగా భావించి స్వగ్రామమునకు తిరిగి వచ్చిన తరవాత 1905 సంవత్సరంలో ఆ శివలింగాన్ని ఇక్కడ ప్రతిష్ఠించి వారి జీవిత కాలమంతా ఆ శివలింగాన్ని అర్చింఛి, పూజించి తదనంతరము శివైక్యం చెందినాడు.